Umorea, festa eta alaitasuna non, Jon Elorza han. 28 urteko azkoitiarra ezaguna da, besteak beste, andremarietako film laburren lehiaketan urteak daramatzalako parte hartzen eta protagonista nagusietakoa izaten. Oraingoan, bere izenak pantailatik Euskaraldiaren hamaikakora egingo du jauzi, eta bera izango da taldera batuko den bederatzigarren herritarra. Ahobizi rola hartuko du ariketa sozialak irauten duen egunotan, bere egunerokoan bezala. Edonon, edonoiz eta edonorekin, euskaraz beti lehen hitza, eta hortik aurrerakoa ere bai, ahal duen guztietan. Bere mezua, ondorengoa: "Euskaraldian saia gaitezen denok euskaraz egiten, egunerokotasunean isla dadin".
Euskararen olatua lehertzeko astebete baino ez da falta —azaroaren 18tik abenduaren 2ra egingo da—, eta Azkoitiko hamaikakoa ere ia osatu dugu. Orain arte aurkeztutako taldekideak ondorengoak dira: Igor Zubeldia, Paki Fernandez, Iban Garate, Firdaus Mohammed Awal, Julen Alberdi, Ixabel Jauregi, Adrian Chohan, Olvido Hernando eta Jon Elorza.
Hitzez ekiteko garaia da lelopean egingo da aurtengo Euskaraldia, eta hizkuntza erabileran eragitea xede duen ariketa kolektiboan parte hartzera deituta daude 16 urtetik gorako euskal herritarrak. Norbanakoen izena emateko epea zabalik dago, eta parte hartu nahi dutenek online eman ahal dute izena, Euskaraldiaren webgunearen bidez.
Horrez gain, aurrerantzean Azkoitian antolatutako ekitaldietan ere horretarako aukera jarriko da. Euskaraldiaren hirugarren edizioan ere mota guztietako entitateek (elkarteak, enpresa handiak, taldeak, dendak, federazioak…) parte hartuko dute arigune-en bidez. Arigune-etan (euskaraz lasai aritzeko guneak) herritarrek ariketa taldean egiteko aukera izango dute. Azkoitian, aurten, 50 arigune eratu dira, iaz jarritako erronka beteta —2020an 32 izan ziren—.
Euskaraldiako Azkoitiko hamaikakoa
Igor Zubeldia, Realeko jokalaria (Ahobizi)
Paki Fernandez, BM supermerkatuko kutxazaina (Belarriprest)
Iban Garate, aurkezlea eta aktorea (Ahobizi)
Firdaus Mohammed Awal, AEK-ko ikaslea (Ahobizi)
Julen Alberdi, Txikia IV.a aizkolaria (Ahobizi)
Ixabel Jauregi, euskaltzalea (Ahobizi)
Adrian Chohan Madinabeitia, Udaltzaina (Ahobizi)
Olvido Hernando, Mintzalaguna (Ahobizi)
