Atzean gelditu da beste uda bat, eta ikasturte berria hastearekin batera eta udazkena iristearekin batera, atal berria estreinatzera dator Maxixatzen: Zaharrak Berri argazki zaharren atala.
Hilero, hileko lehen igandean, iraganari begira jarri, eta Azkoitiko aspaldiko argazki bat aukeratu eta partekatuko du atari honetako erabiltzaileekin.
Estreinako aldirako, ikasturte hasierari estuki lotutako argazki zahar bat aukeratu da: Azkoitiko tren geltokia. 1915ean Indalecio Ojangurenek ateratako argazkia da, eta gaur egun tren geltokia ez, baina herriko udal liburutegia hartzen du eraikinak. Herriko ikasleentzat ikasturtez ikasturte toki erreferentea izan da azken hamarkadetan.
Argazkiaren jatorria: Kutxateka.eus.
Maxixatzenek herritarrak animatu nahi ditu etxean gordeta dituzten argazki zahar eta esanguratsu horiek hartu, eta atal honetan partekatzera. Argazkia emailez bidal daiteke–azkoitia@ukt.eus– edo eskura eman daiteke – Kale Nagusia, 62–.