“Hizkuntza-eskubideen urraketak gainditzeko bidea ekitea da”
Hizkuntz Eskubideen Behatokiak Duintasun bideak bildumako lan berri bat egin du, Gogoan
izan goiburua duena. Oraingoan, Alzheimer gaitza duen pertsona batek euskaraz bizitzeko
duen nahia eta determinazioa ditu ardatz dokumentalak. Duen gaitza dela eta jaso behar
duen tratamendu bat erdaraz jasotzea proposatzen diotenean, Maixus Rekaldek argi ikusten
du hori ere euskaraz jaso nahi duela eta tinko egiten du horren alde, hori lortzen duen arte.
Behatokia izan du bidaia horretan bidelagun.
“Argi adierazten du adibide honek injustiziaren bidean errebelatzen den herritarrak, aurkitzen
dituen oztopoen aurrean amore eman gabe, nahi duen hori, eskubidezkoa duen hori lortu
egiten duela”, Garbiñe Petriati, Hizkuntz Eskubideen Behatokiaren zuzendariaren ustez. Bide
hori batera egitearen garrantzia ere nabarmendu du. Izan ere, “hizkuntza arazoa ez da
indibiduala bakarrik, kolektiboa ere bada eta ondorioz, kolektiboak eman behar dio
erantzuna”, esan du.
“Hizkuntza-eskubideen urraketa jasaten duenean, nahigabea, amorrua, inpotentzia…
bizitzen ditu herritarrak, baina, euskaraz bizitzeko duten nahia horren guztiaren gainetik
dago. Pertsona hauek euskarak egiten ditu direna. Euskarak egiten du Maixux. Euskararik
gabe ez da bera”.
Euskaraz bizi nahi duten pertsonek bi aukera dauzkate, egoera bere horretan irenstea edo
errebelatzea. Bigarrenaren aldeko hautua egiten duena saiatzen da konponbidea bilatzen.
Eta jarrera hori hartzen duten herritarrek Behatokia bere ondoan izango dutela nabarmendu
du Petriatik; izan ere, euskaraz bizitzeko nahia horretarako urratsa ematen denean betetzen
da. Behatokiaren ustez, horrelako jarrerak beharrezkoak dira, izan ere, “horrelako jarrerek
ekarriko dute aldaketa”.
2015eko azaroaren 10a