Irribarrerik ez da falta izan gaur Azkoitiko kaleetan. Goizean iritsi dira Olentzero eta Mari Domingi herrira, San Martin aldetik, eta kalez kale ibili dira haurrekin batera Gabon kantak abestuz. Eliz atarian jarria zuten hitzordua bi ikazkinek, eta kalejiraren ostean, bertan jaso dituzte haurren gutunak.
Herrian goizean goizetik nabarmendu da Gabon giroa. Izan ere, hainbat izan dira Gabon eskean atera diren herritarrak; tartean, Floreaga Ikastetxeko kideak ibili dira trikitiaz lagundurik herriko kaleak gurutzatzen. Horrez gain, Azkoitiko Udal Musika Bandak eta Iraurgi abesbatzak Gabonetako kontzertua eskaini dute Kontzejupean, eta dozenaka herritarren arreta bereganatu du ekitaldiak. Egun osoan zehar jarraituko du jaiak, eta 19:00etatik aurrera, ohi bezala, Gabonetako karta jokoa izango da tabernetan.
