56 kasu positibo zenbatu dituzte Gipuzkoan

Osakidetzak eta Osasunbideak 7.918 proba diagnostiko egin zituzten atzo, larunbata, Araban, Bizkaian, Gipuzkoan eta Nafarroan, eta 394 positibo kasu zenbatu zituzten. Hala ere, atzo herenegun baino proba gutxiago egin zituzten lau lurraldeetan, eta positibotasuna %5ekoa da.

Hego Euskal Herrian 394 positibo zenbatu zituzten atzo, larunbata, egindako 7.918 PCR eta antigeno probetan. Herenegungo datuekin (545 positibo) alderatuta, kasu positibo kopuruak behera egin du, baina ostiralean baino 3.432 proba gutxiago ere egin zituzten atzo Osakidetzak eta Osasunbideak. Positibotasuna %5ean dago gaur egun, herenegun baino zertxobait altuago.

Eusko Jaurlaritzako eta Nafarroako Gobernuko osasun sailek emandako datuak kontuan hartuta, lurraldeka honakoak dira datuak: Araban, Bizkaian eta Gipuzkoan 6.295 PCR eta antigeno proba egin zituzten atzo, eta 337 pertsonak eman zuten positibo; hau da, %5,4k. 53 positibo zenbatu zituzten Araban, 224 Bizkaian eta 56 Gipuzkoan, eta beste lau positibo beste erkidego edo toki batzuetako pertsonek eman zuten. Nafarroan, berriz, herenegun baino kasu positibo bat gutxiago atzeman zuten atzo, 57. Lurralde horretan, denera, 1.623 test egin zituzten eta positibotasun tasa %3,5ekoa da.

Osakidetzaren eremuko ospitaleen egoerari dagokionez, COVID-19aren ondorioz 36 pertsona ospitaleratu zituzten atzo, eta 144 pertsona daude ZIU Zaintza Intentsiboko Unitateetan ospitaleratuta, atzo baino bi gutxiago.

Herrikako datuak bihar, astelehena, kaleratuko ditu Eusko Jaurlaritzako Osasun Sailak. Ostiralera arteko datuak kontuan hartuta, Azkoitiak eremu horian jarraitzen du. Otsailaren 13tik 18ra bitartean, bi kasu positibo soilik atzeman zituzten herrian. Hori horrela, beheranzko joerari eutsi zion hamalau eguneko 100.000 biztanleko intzidentzia tasak: 125,18koa zen ostiralean.

Maxixatzen da Azkoitiko euskarazko aldizkari bakarra, eta zu bezalako irakurleen babesa behar du aurrera egiteko.


Izan zaitez Maxixatzeneko bazkide