Oteiza frontoietan hasi dugu ekitaldia. Herritar talde zabala bildu gara bertan, 'Nik sinatuko dut' leloa eskuan hartuta. Urrats taldeak gaurko prestatu duen adierazpena irakurri ostean, herriko plazara abiatu gara, sinadurak biltzeko mahaia jartzera. Txosna bat ere jarri dugu, festa borobiltzeko.
Erabakiaren olatua handitzen ari da gurean ere. Galdeketarako bidea marrazten hasi baino ez gara egin. Sinadurak biltzen jarraituko dugu datozen egunotan eta asteotan. Zurea ere beharrezkoa da!!!
Eneritz Artetxe bertsolariak gaurko egunari jarri dion bertso dotorea, jarraian:
Zer da konpromisoa,
eta zer ardura?
Lekukoa badoa
eskutik eskura
ta azkoitiarrona
guztion esku da
Hizkuntza, ekonomia
edota kultura
aukeratzeko noizbait
izan nahi den hura
Herri honek behar du
Zure sinadura!
Gaur irakurri dugun adierazpena:
Duela hamabost egun URRATS taldea aurkeztu genuenean adierazi genuen gure ibilbidea zein izango zen, URRATSEZ URRATS aurrera jotzea herri-galdeketa zabala egitea lortu arte. Gaurkoan bada, beste URRATS bat egitera gatoz. Bidea urratuko duen urratsa. Izan ere, eskualdeko gainerako herriei aurrea hartu, eta GAUR BERTAN hasita, HILABETE BATZUETAN, herri-galdeketarako ezinbestekoak diren sinadurak biltzen ariko gara herritarren artean. Atzetik, gure urratsei segika etorriko zaizkigu Zestoa, Zumaia, Getaria, Zarautz eta Orio eta jendea elkarrengana biltzen denean mugarik ez dagoela erakutsi behar dugu denon artean.
Esaerak dio izena duen oro badela, eta azkoitiarrok ere bagara. Nor gara erabakitzeko. Eta izan bagarelako badugu izena. Izena eta abizena, eta denak ditugu beharrezko; izena, abizena eta izenpea. Izan Urrategi, Intza, edo Ibrahim. Izan, Larrañaga, Gonzalez edo Abbas, gerturatu, sinatu eta besteei mezua zabaldu.
Boligrafoz edo lumaz, hatzez nahiz arkatzez. Sinatu eta indarrak batu. Batu eta biderkatu, hautestontziak betetzen ditugun egunera arte.
