Aritz Aranbarri (Azkoitia, 1998) Realeko futbol jokalari azkoitiarrak Europan egin zuen debuta atzo, osteguna. Talde txuri-urdinak Xeriff taldearen aurka Tiraspolen jokatu zuen Europa League txapelketako hirugarren jardunaldiko neurketa, eta huts eta bi irabazi zuen taldeak. Azkoitiarra Reala B taldeko jokalaria bada ere, Imanol Alguacil Realeko entrenatzaile oriotarrak behin baino gehiagotan deitu du lehen taldearekin entrenatzeko.
Hain zuzen, Realaren lehen taldearekin 2020ko azaroaren 1ean egin zuen debuta; Celtaren aurka Balaidos futbol zelaian jokatu zituen aurreneko minutuak elastiko txuri-urdinarekin. Atzokoa, ordea, Europako futbol txapelketa batean Realarekin jokatzen zuen lehen aldia zen azkoitiarrarentzat. Aranbarri hasieratik aritu ez bazen ere, hogei minutu baino gehiago jokatu zituen; izan ere, 69. minutuan zelairatu zuen Alguacilek Alex Sola eskuin hegaleko atzelariaren ordez.