Gasteizen 32 urteko emakume baten hilotza aurkitu zuten igandean apartamentu hotel bateko logela batean, bortxa zantzuekin, 3 urteko alaba alboan zuela; hura onik zegoen. Ertzaintzak adierazi duenez, indarkeria matxista gisa ikertzen ari dira kasua, eta haren bikotekide ohia atxilotu dute Zaragozan (Espainia). Bi asteren barruan Euskal Herrian gertatzen den bigarren hilketa matxista da, eta hori salatzeko, protestak egin dituzte han-hemenka, baita Azkoitian ere. Atzo arratsaldean elkarretaratzea egin zuten plazan, Urola Erdiko Itaiak deituta.
Itaiak nabarmendu du "gogor salatzen" duela gertakaria eta "babes eta elkartasun osoa" adierazten dizkietela hildako emakumearen familiari eta haren ingurukoei. "Emakume langileon aurkako erasoak eguneroko ogia dira bizi dugun errealitate sozialean. Horren adibide ditugu azken asteetako bi hilketa matxistak, baita jazo diren eraso matxista guztiak ere; Irunen, Lasarte-Orian nahiz Aiaran duela egun gutxi salatutakoak, esate baterako. Etsaiaren boterea mantentzeko funtzioa duen eta arau kultural bilakatu den ideologia matxistak gizonaren gailentasunerako testuinguru paregabea sortzen du. Hori dela eta, emakume langileon zaurgarritasun egoera baliatuta, gure aurkako erasoak etengabeak dira", adierazi du taldeak.
Egoera horren aurrean, Itaiak azpimarratu du "ezinbestekoa" dela "indarkeria matxista gainditzeko erantzun eraginkorrak hedatzea, emakume langileen aurkako erasoak gauzatzen dituzten figurak seinalatzea eta emakumeak egoera horretatik askatzeko beharrezko baliabide ekonomiko eta sozialak garatzea". Urola Erdiko Itaiak horretan lanean jarraitzeko "konpromiso osoa" adierazi du.