20:00 jota, itxi berri dituzte herriko lau bozkalekuak, eta orain herritarrek egin duten aukera zein den ezagutzeko ordua da. Hasi berri dira Azkoitiko hamahiru hauteslekuetako mahaikideak azkoitiarrek egun osoan zehar emandako botoak zenbatzen. Gaur, bi kutxatako botoak zenbatu beharko dituzte mahaietako arduradunek: batetik, udal hauteskundeetara begira herritarrek egindako hautua ezagutuko dute, eta bestetik, foru bozetakoa.
14:00etan eman dute hauteskunde eguneko lehen parte hartzea datua, eta ordurako herritarren %36,63k emana zuen botoa. Zenbateko hori 2019ko udal hauteskundeetakoa baino 3,87 puntu txikiagoa da; izan ere, botoa emateko aukera zutenetatik %40,5ek eman zuen botoa duela lau urteko hauteskundeetan. 18:00etan jakinarazi dute eguneko bigarren parte hartze datua, eta ordu horretarako herritarren %50,4k eman du botoa; duela lau urte baino 5,34 puntu gutxiagok eman du botoa gaur ordu horretarako.
Botoa emateko epea amaitu berri, laster ezagutuko dira bai emaitzak eta bai parte hartze datuari dagozkion datuak. Boto zenbaketak aurrera egin ahala jarraitu ahal izango dituzte herritarrek gaurko hauteskundeen emaitzak Maxixatzen.eus-en.