'Elkar+ekin gara!' ekimenaren barruan, 'Elkar+ekin dantzan' ekimena egin dute gaur, martxoak 20, Euskal Herriko herri eta hirietan. Azkoitiko Bizkargi musika eta dantza eskolako kideek ere parte hartu dute ekimenean, eta, 11:00etan, herriko plaza nagusian elkartu dira eskolako kideak.
Hiru dantza eskaini dituzte Olatz Salvadorrek eta Bihotx taldeak ekimenerako egokitutako Martxa baten lehen notak abestiak lagunduta: euskal dantzak, mutxiko erako dantzak eta dantza garaikidea. Dantzarako gosea, ordea, ez zaie hor amaitu, eta beste hainbat dantza ere egin dituzte. Herritarrek irrintziekin eta txalo artean eskertu dute haiek egindako lana.
EIBE Elkarteen Ikerketa eta Berrikuntzarako Ekosistema elkarteak sustatu du ekimena, eta elkarteen zein boluntarioen lanari balioa ematea da haren helburua. Horretarako, dantza ekimena antolatu dute Euskal Herri osorako, herriz herriko dantza taldeekin eta eskolekin elkarlanean.