Marea Urdina elkarteko kideen eta Balda plazako terrazetan zeuden herritarren txalo artean eta babesarekin ekin dio Imanol Alesonek bere buruari jarritako azken erronka. Marea Urdinaren alde, Urola bailarako mendi eta haranetan barrena ibiliko da korrika atleta azkoitiarra, erronka honetarako 'azkoitiartu' duten Urolako Itzulia osatzeko. 140 kilometroko ibilbidea da guztira, eta 24 orduren barruan osatzea da Alesonen erronka. 19:00etan puntuan irten da gaur Balda plazatik, eta biharko 19:00etarako toki berera itzultzea du helburu.
Bien bitartean, Azkarate, Elosua, Gorla, Deskarga, Udana, Aztiria, Madariaga, Zumarraga, Antigua, Mandubia, Santa Ageda, Urraki, Trintxera, Iturriotz, Urdaneta, Meaga, Garate, Santioko hondartza, Zumaia, Elorrixa, Endoia eta Aittola zeharkatuko ditu Alesonek. Berea da erronka, baina bidea ez du bakarrik egingo; hasteko, Ixaka Oñederra behintzat ondoan izango du lehen kilometroetan.