Osasun Sailak hiru kasu positibo baieztatu ditu herrian

Intzidentzia tasak bederatzi puntu egin du behera. Araba, Bizkai eta Gipuzkoako kasu metatuen tasak berriz ere behera egin du, eta 166,39an kokatu da.

Eusko Jaurlaritzako Osasun Sailak kaleratu dituen datuen arabera, Azkoitian hiru kasu positibo zenbatu zituzten atzo, astelehena, egindako PCR eta antigeno probetan. Hala eta guztiz ere, azken hamalau egunetako 100.000 biztanleko intzidentzia tasak behera egin du atzotik herrian; izan ere, bederatzi puntu egin du behera, 200eko langara hurbilduz. Gaur-gaurkoz 216,97ko tasa du Azkoitiak.

Urola Kosta eskualdean, berriz, hemeretzi kasu positibo baieztatu dituzte, guztira. Aian zenbatu dituzte kasuen erdiak baino gehiago; izan ere, azken orduetan bederatzi herritarrek eman dute positibo gaixotasuna detektatzeko probaren batean. Hori horrela, hango intzidentzia tasa 705,97raino igo da. Azkoitian bezala, Azpeitian eta Zarautzen ere hiru kasu positibo atzeman ditu Osasun Sailak. Azpeitiko intzidentzia tasa 210,25ekoa da egun, eta Zarauzkoa 107,08koa. Zumaian, berriz, positibo bat baieztatu dute, eta hango intzidentzia tasa 183,17koa da gaur.

Eskualdeko gainerako herrietan, aldiz, ez dute positiborik baieztatu. Aizarnazabalen, Beizaman eta Errezilen hutsean dute kasu metatuen tasa. Getaria, ostera, eremu berdean dago 35,34ko tasarekin eta Orio zein Zestoa horian, 97,85 eta 154,08ko intzidentzia tasekin, hurrenez hurren.

Positibotasun tasa, behean

Hego Euskal Herrian COVID-19ak eragindako pandemia asko ari da apaltzen azken asteetan. Horren adibide dira atzo, astelehena, baieztatutako kasu positiboak. Araban, Bizkaian eta Gipuzkoan 6.289 test egin zituzten, eta 218 lagunek eman zuten positibo –Araban 21, Bizkaian 100, Gipuzkoan 89 eta lurralde horietatik kanpoko herritarren artean zortzi–; positibotasun tasa, beraz, %3,5ekoa izan zen atzo. Nafarroan, ostera, proba egin zuten 1.558 lagunetatik 27k besterik ez zuten eman positibo, hau da, proba egin zutenen %1,7k.

Atzoko datuen arabera, Osakidetzaren ardurapeko erietxeetan COVID-19ak jotako 31 lagun ospitaleratu zituzten, eta egun 166 lagun daude ospitaleratuta; 54 dira ZIUn dauden gaixoak. Nafarroan, berriz, bi lagun ospitaleratu zituzten atzo, eta gaur-gaurkoz 62 dira erietxean dauden herritarrak; ZIUn larri daudenak, berriz, hamazazpi dira. Araban, Bizkaian eta Gipuzkoan intzidentzia tasak beste bost puntu egin du behera, eta 166,39an kokatu da. 

Maxixatzen da Azkoitiko euskarazko aldizkari bakarra, eta zu bezalako irakurleen babesa behar du aurrera egiteko.


Izan zaitez Maxixatzeneko bazkide