Egun batzuetan gehiago, beste batzuetan gutxiago, baina ez dago egunik kasu positiborik gabe eskualdean. Eusko Jaurlaritzako Osasun Sailak eguerdian emandako datuen arabera, beste 21 kasu positibo izan ziren atzo Urola Kostan. Azkoitian hiru positibo berri hauteman dituzte, eta 100.000 biztanleko azken hamalau egunetako tasa 158,68ra igo da. Bestalde, Azpeitian izan dituzte oraingo honetan kasu gehien, zortzi guztira. Hala ere, tasa metatuen beheranzko joerarekin jarraitzen dute han: 335,09 puntuko intzidentzia tasa du gaur gaurkoz Azpeitiak, bezperan zuena baino 26 puntu gutxiago.
Getarian eta Zarautzen ere hiruna kasu izan dituzte. 304,11ko tasa dute Zarautzen eta 671,38koa Getarian. Orion, berriz, bi kasu izan zituzten atzo, eta kasu metatuen tasa 244,62koa dute herrian.
Egun batez gorriz jantzita egon ondoren berriro eremu laranjara itzuli dena Zumaia da. Atzo kasu positibo bat zenbatu zuten kostaldeko herrian. Intzidentzia tasak, berriz, 51 puntu egin zuen behera, eta 356,16 puntuan kokatu da. Zestoan ere kasu bat detektatu zuten atzo egindako probetan, eta 513,61 puntuko tasa du gaur gaurkoz. Aian, Aizarnazabalen, Beizaman eta Errezilen ez zuten atzo kasu berririk izan.
Hego Euskal Herriari dagokionez, 737 positibo atzeman zituzten atzoko probetan. Araban 105 kasu izan ziren, 321 Bizkaian, 201 Gipuzkoan eta 94 Nafarroan.
Osakidetzak azaldu duenez, atzo beste 39 lagun ospitaleratu zituzten Arabako, Bizkaiko eta Gipuzkoako ospitaleetan –238 lagun daude ospitaleratuta guztira–. Zaintza Intentsibotako Unitateetan, berriz, 78 zauden atzo ingresatuta. Bezperan baino lagun bat gutxiago da.