Eusko Jaurlaritzaren Osasun Sailak argitaratu berri ditu azken hiru egunetan egindako PCR eta antigeno proben emaitzak, eta datuek beheranzko joera hartu dute Azkoitian. Hogei kasu positibo hauteman dituzte ostiraletik igandera bitartean –zazpi ostiralean, sei larunbatean eta zazpi igandean–. Gaur Osasun Sailak emandako datuak joan den astelehenean jakinarazitakoak baino baxuagoak dira; izan ere, duela astebete 28 kasu positiboren berri eman zuen Jaurlaritzak.
Kasuek bezala, azken hamalau egunetako 100.000 biztanleko intzidentzia tasak ere jaisteko bidea hartu du Azkoitian. 1.159,98koa da intzidentzia tasa gaur-gaurkoz Azkoitian, hain zuzen ostiraleko datua baino 242 puntu txikiagoa. Ostiralean tasa 1.401,99an zegoen herrian.
Urola Kosta eskualdean, berriz, 130 kasu atzeman dituzte eskualdean ostiraletik igandera bitartean, joan zen astelehenean baino 60 gutxiago. Edonola ere, 5.000 biztanletik gorako herri guztiek 400dik gorako intzidentzia tasarekin jarraitzen dute oraindik ere: alegia, itxita daude guztiak, eta perimetralki itxita jarraitu beharko dute beste astebetez gutxienez ere. Horiez gain, Osasun sailak ebatzi du perimetralki itxita jarraituko dutela Aiak , Getariak eta Zestoak, eta zerrenda horretan sartu du Aizarnazabal ere.
Positiborik gehien, beste behin, Zarautzen atzeman dituzte: 53. Joan zen asteko datuekin alderatuta, behera egin dute positiboek, baina intzidentzia tasak gorantz egin du 1.1212,15ean kokatuta. Zumaian gorakada nabarmena izan du intzidentzia tasak astebetean –aurreko astean 936,20an bazegoen, orain 1.333,06an dago (eskualdeko 5.000 biztanletik gorako herrietatik altuena)–, eta aurreko astean bezalaxe, asteburu honetan ere 24 kasu berri hauteman dituzte.
Orion ere jaitsi egin dira asteburuko positibo datuak: sei kasu hauteman dituzte; aurreko astean hamabost izan ziren. Hala ere, intzidentzia tasak gora egin du, eta 1.190,48koa da gaur-gaurkoz. Azpeitian aurreko asteko kopuru bera baieztatu du Osasun Sailak: 17 kasu positibo. Horrez gain, intzidentzia tasak gora egin du eta 611,04an kokatu da une honetan.
Eskualdeko 5.000 biztanletik beherako herrietan beheraka doa COVID-19 gaitzaren hedapena. Aian hiru kasu izan dira asteburuan, Aizarnazabalen eta Getarian bina eta Zestoan hiru. Beizaman eta Errezilen ez dute kasurik hauteman.
Hegoaldean goraka
Guztira, 890 kasu positibo hauteman zituzten atzo Hego Euskal Herrian, eta 10.470 PCR eta antigeno proba egin zituzten lau lurraldeetan. Positiborik gehien Gipuzkoan zenbatu zituzten (356), eta, ondoren, Bizkaian (325), Nafarroan (128) eta Araban (75); lurralde horietatik kanpoko beste sei kutsatu ere.
Ospitaleratze kopuruak nabarmen ari dira goraka herrialde osoan: 568 pertsona daude une honetan Araba, Bizkai eta Gipuzkoako ospitaleetan, eta 200dik gora Nafarroakoetan. ZIUetan ere bide beretik doa joera: 192 daude Araba, Bizkai eta Gipuzkoan. Positibotasun tasari dagokionez, berriz, %8,6koa da Araba, Bizkai eta Gipuzkoan eta %7,8koa Nafarroan.