Atzo, ostirala, koronabirusa atzemateko 9.586 proba egin zituzten Hego Euskal Herrian –7.692 Araba, Bizkai eta Gipuzkoan, eta 1.894 Nafarroan–. Positibotasun tasa %2,4koa izan zen Nafarroan eta %4,9koa Araba, Bizkai eta Gipuzkoan. Hain zuzen, 45 kasu positibo zenbatu zituzten Nafarroan, 71 Araban, 181 Bizkaian eta 86 Gipuzkoan; beste 11 atzeman zituzten beste erkidego edo toki batzuetan. Eusko Jaurlaritzak eta Nafarroako Gobernuak astelehean jakinaraziko dituzte herri bakoitzeko datu zehatzak.
Aurreko larunbatean, otsailak 20, argitaratu zituzten datuei erreparatuta, astebetean behera egin du baieztatutako kasu positiboen kopuruak. Otsailaren 19an egindako PCR eta antigeno probetan 545 positibo atzeman zituzten Hego Euskal Herrian, atzoko probetan baino 151 gehiago. Positibotasun tasa ere jaitsi egin da aurreko astetik; joan den astean %5ekoa zen Araba, Bizkai eta Gipuzkoan eta %3,6koa Nafarroan.
Erietxeetako egoerari dagokionez, Osakidetzan 57 pertsona ospitaleratu zituzten atzo. Gaur-gaurkoz, COVID-19a dela eta, 123 pertsona daude Zainketa Intentsiboetako Unitateetan.