ELA sindikatuak lanuztea deitu du Dia supermerkatuetan datorren astelehenerako

Orduerdiko bi lanuzte egingo dituzte; 12:00etatik 12:30era bata eta 17:00etatik 17:30era bestea. Segurtasun neurri zorrotzagoak eta langile gehiago eskatuko dituzte, besteak beste.

ELA sindikatuak ordu erdiz lanuztera deitu ditu Arabako, Bizkaiko eta Gipuzkoako Dia supermerkatuetako langileak, eta horien artean, Azkoitikoak. Segurtasun neurri zorrotzagoak eta langile gehiago eskatzeko egingo dituzte lanuzteak, astelehenean, bi txandatan: 12:00etatik 12:30era eta 17:00etatik 17:30era.

Sindikatuak adierazi du Dia supermerkatuen egoera "kritikoa" dela hasieratik eta kateko supermerkatuak kudeatzen dituzten enpresei eskatu die langileei aitortzeko egiten duten esfortzua eta ordaintzeko sartzen dituzten aparteko orduak. Horrez gain, Dia supermerkatuetan segurtasuna bermatzeko neurri gehiago hartzeko eskatu du sindikatuak eta baita langile gehiago kontratatzeko ere, lan kargari aurre egiteko. ELAk gaitzetsi egin du Dia kateko saltokiak ohiko lan ordutegira itzuli izana —09:00etatik 21:00etara— eta eskatu du ordutegia murrizteko, langileek lana eta familiako betebeharrak uztartzeko aukera izan dezaten.

Maxixatzen da Azkoitiko euskarazko aldizkari bakarra, eta zu bezalako irakurleen babesa behar du aurrera egiteko.


Izan zaitez Maxixatzeneko bazkide