Passepartout taldeak orain dela aste gutxi kaleratu zuen euren disko berria. Hamabi kantaz osatutako diskoa kaleratu du taldeak; bi instrumentalak dira eta gainerako hamar letra eta guztizkoak. Oholtza gainean egingo duten diskoaren aurkezpenerako «gogor» prestatzen ari direla azaldu dute taldekideek.
Itzi Beitiak —teklak—, Jontxu Apek —baxua—, Ruben Lizarraldek —gitarra—, Tomas Lizarazuk —gitarra eta ahotsa— eta Xabi Arrietak —bateria— joan den urteko abuztutik zuten buruan diskoa sortzea eta egikaritzea. Orduan hasi ziren lehen konposaketa lanekin eta entseguekin, baina grabaketa lanak urtarrilean hasi zituzten. Sinergia diskoa salgai dago Atraskua tabernan, 5 euroren truke.
