- Gaia: Herriko Gabonak
- Doinua: Mutil koxkor bat itsuaurreko
Gure herriko denda bateko
eskaparateko jiran
jarritakoak atentzioa
ta kezka sortu zizkidan
leiho barruko Papa Noelak
barrez begiratzen zidan
Happy New Year ta Merry Christmas
koloretsuak segidan
pentsatu nuen ea Gabonak
noiz eta non hasten ziran (bis).
Dena argia ta dena festa
izaten da Gabonetan
baina guztiak ez du balio
kontsumo garai honetan
kontzientzia ta poltsikoa
izan beharko alertan
beraz Herrixen gasta dezagun
bertakoa eta bertan
euskara eta euskal kultura
ez daudelako ofertan (bis).