Guztira, bost bikotek parte hartu dute gaur Gasteizko Iradier Arenan jokatu den Arabako 28. Dantza Solteko Txapelketan. Bikote horietatik bi Azkoitiko Bizkargi musika eta dantza eskolako dantzariak izan dira, eta horietako batek lortu du txapelketa irabaztea; hain zuzen ere, Laura Bastida eta Ekain Uzkudun dantzari azpeitiarrek osatutakoak. Bastidak eta Uzkudunek 390 euroko saria, garaikurra, txapela eta zapia eskuratu dituzte.
Txapelketan bigarren egin duen bikotea Maren Galvezek (Lezo, Gipuzkoa) eta Gorka Granadok (Sopela, Bizkaia) osatutakoa izan da. Hirugarren sailkatutakoak, berriz, Katerin Artola eta Iker Belintxon (Lezo) izan dira. Txapelketa Arabako Dantzarien Biltzarrak eta Arabako Foru Aldundiak antolatu dute, eta epaimahaikideak honakoak izan dira: Juanjo Lauzirika, Luis Santiago Garamendi, Estibaliz Asurmendi, Maribel Ortiz de Zarate eta Gorka Oraa.
Arabako dantza txapelketan parte hartu duen Bizkargiko beste dantzari bikotea Itziar Bastidak eta Anaitz Lizartzak osatutakoa izan da.