Realak omenaldia egin zien atzo 2021-22 denboraldiaren amaieran kluba utzi zuten harrobiko futbol jokalariei. Egun, Azkoitiko Anaitasuna futbol taldearen harrobian jokatzen duen Aritz Sudupe Realeko atezain ohia omendu zuen klub txuri-urdinak. Irungo (Gipuzkoa) Ficoban egin zuten omenaldi ekitaldia, klubeko zenbait teknikarik eta taldekidek inguratuta.
Realaren harrobian aritu diren jokalariek, beraien familiekin batera, klubaren aitortza jaso zuten atzo. Ekitaldiaren hasieran, hitzaldia eskaini zuten kirol munduko hainbat aurpegi ezagunek, tartean Jon Ansotegi Realeko jokalari ohiak, Jon Salsamendi Orio arraun elkarteko entrenatzaileak, Leire Olabarria txirrindulari ohiak eta Ibon Mugertza snowboarderrak eta surflariak. Lagun horiek beraien kirol esperientziaz aritu ziren, baita egoerak gainditzeko espirituaren garrantziaz ere.
Ekitaldiaren amaieran egin zien Realak harrobiko jokalari ohiei omenaldia, eta horiek beraien klubeko lagunen eskutik jaso zuten klubaren elastiko bana. "Gure armarria defendatu dute jokalari horiek guztiek, eta beti izango dira gure familiako kide bat", azaldu du Realak.