Iñigo Antsorregi elkarrizketatu zuten atzo, asteartea, ETB1eko Biba zuek! saioan. Maddalen Arzallusek eta Xabier Sukiak zuzentzen duten telebista saioan parte hartu zuen azkoitiarrak. Hain zuzen ere, depresioari buruz hitz egin zuten saioan, eta hainbat lagun gonbidatu zituzten, bakoitzak depresio aldian bizitakoa kontatu zezan.
Antsorregik azaldu zuen "zaila" dela norbere barruan gertatzen denari buruz hitza jartzea. Atzo, ETB1eko kameren aurrean azaldu zuen 2019az geroztik pairatu duen depresioak bere baitan zer eragin izan duen. Izan ere, triste zebilen bolada batean, hil egin nahi zuela kontatu zion amari. Prozesuan zehar jendearen testigantzak entzuteak "on" egin ziola nabarmendu zuen azkoitiarrak, eta orduan depresiotik ateratzea dagoela ikusi zuen. Orduan jasotako mezu bera zabaldu nahi izan zuen Biba zuek! saioan Antsorregik.