Eguneko gai-zerrendak mugatzen du gaurkotasuna, milaka hedabidek zabalduta, eta hedabide handiek merkatuak jotako doinuan egiten dute dantza.
Astelehena: Txinako birusa, Ukrainako gerra eta Irango beloa lehen orrian, uneko albistetzat egiaztatuz klima-aldaketa izan daitekeela tenperatura igotzearen kausa.
Asteartea: Txinako birusa, Ukrainako gerra eta Irango beloa azalerako, Serratek agertokiak uztearekin batera.
Asteazkena: Txinako birusa, Ukrainako gerra eta Irango beloa lehenengoan, osagarritzat eskainita Michelin jatetxe berriak, erregeen kabalgatak eta Niñoko zozketa.
Osteguna: Txinako birusa, Ukrainako gerra eta Irango beloa aurrena, Brasilgo Lularen kargu-hartzea hurrena.
Ostirala: Txinako birusa, Ukrainako gerra eta Irango beloa lehen planoan, elikagaiei BEZa kentzea eta indarkeria matxistaren azken kasua bigarrenean.
Larunbata: Txinako birusa, Ukrainako gerra eta Irango beloa, hasteko, Peleri azken driblinean lagundu dion hileta-segizioa, osteko.
Igandea: Txinako birusa, Ukrainako gerra eta Irango beloa lehen orrian, Erroman Benedikto aita santua agurtu duten milaka katolikoak gero. Hainbeste hedabide zenbatu, bai gutxi kontatu.