"Elkarguneko padel pistan jokatu ahal izateko, udalak egun indarrean duen araudiari buruz idatzi nahi dugu. Elkarguneak, Azkoitiko Udalak esanda, buruz buru jokatzeko aukera uzten du, edo bestela, binaka ere bai. Bi lagunek beste biren aurka jokatzeko, ordea, pistaren alde banatan daudenek familia berekoak izan behar dutela zehazten du udalak.
Maiatzaren 7ko legediari eusten dio udalak erabaki hori bermatzeko. Dekretu horretan honako hau irakurri daiteke: federatu gabeko kirol-jarduera fisikoa bakarka edo taldeka egin ahal izan da aire zabalean, kontaktu fisikorik gabe, eta aldi berean sei laguneko taldeetan, gehienez ere.
Padela kontaktu fisikorik gabeko kiroltzat hartzen dugu guk, eta beraz, ez dugu arazorik ikusten binaka jokatu ahal izateko. Hau guztia esanda, udalak ez baldin badu nahi herritarrok modu horretan jokatzea, ez dugu jokatuko, baina uste dugu Elkarguneko bazkideak garen heinean eta indarrean dagoen legediarekin, aukera eduki beharko genukeela".