Gertatu izan zaigu tabernan zeozer eskatu eta kanpora irten behar izatea, musikak belarrian mina egiten digulako eta hitz egiteko deiadarka aritu behar dugulako. Zerbitzari batzuei bolumena gutxitzeko eskatuta ere, kasu zipitzik ez (edo orduan eta ozenago jarri, deskuidatuz gero!).
Ez da sanoa, ez da batere atsegina, eta ez dut uste legezkoa denik ere. Eta udara partean, gaitz erdi: behintzat kanpora atera gaitezke gor gelditu eta eztarria bertan laga aurretik. Neguan, ordea, zer egin behar dugu? Belarriko tapoiak jantzi eta keinu hizkuntza ikasi? Etxean gelditu? Nik uste badela horren aldean soluzio logikoagoa: tabernari maiteok, prezioak ez dituzue jaitsiko, baina gutxienez bolumena jaits ezazue, arren, azkoitiarron mesedetan.
G.L.L.