Martxoko Maxixatzen aldizkaria labetik ateratzear dago. Bertan landutako edukien artean, Intsausti eremuaren lehengoratzeaz erreportajea egin du Maxixatzenek. Andoni Elduaien kazetariak aletu ditu proiektuaren inguruko xehetasunak martxoko zenbakian.
Symbiorem izeneko Europako proiektuaren barruan, lurreko kutsadura kentzen adituak diren zenbait erakunde eta enpresa, tartean Azkoitian egoitza duen Iragaz Watin ari dire aipatutako lanak egiten. Hain zuzen, lurrak deskutsatzeko entsegua ari dira egiten Intsausti eremuan. 33 metro kubikoko kokaleku erreala du.
Tratamendu biologikoa eta nanoteknologia tratamendua uztartu ditu enpresak, eta 'Biona' izeneko produktua da emaitza. Produktu horrekin ari dira Intsaustin lurrak lehengoratzen. Gasolioaren lurpeko depositu bat zegoen Intsaustin, eta haren zirkulazioagatik eta filtrazioengatik, ingurua kutsatuta zegoen. Tratamendu biologikoan konposta erabiltzen dute, eta orduan, laborategian indartutako bakterioak sartzen dituzte lurrean, horiek poluzio molekulak jan ditzaten. Zenbait eremutan kutsadura %80 jaistea lortu dute. Beste batzuetan, berriz, araututako kutsadura mugatik oso gertu gelditu dira.