Bihar, ostirala, bi musika talderen kontzertuak izango dira Zurt tabernan. 23:00etan hasita, Silitia eta Azkoitiko Ramona's First Evil Boyfriend taldeak izango dira protagonistak Kale Nagusiko tabernan.
Xabier Barrutiak (gitarrak, baxua, bateria eta teklatua) eta Ibai Silicatok (ahotsa eta perkusioa) osatzen dute Silitia. Iaz, Gaztea irrati katearen 30. Maketa Lehiaketa irabazi zuen taldeak. Silitia Bilbon sortu zen, eta taldearen estiloa anitza da; batzuetan rockeroagoa da, eta beste batzuetan, poperoa, lasaiagoa, mistikoagoa, elektronikoa edota guztiz organikoa. Oro har, inprobisaziotik hastea eta dantzatzea gustatzen zaio bikoteari.
Ramona's First Evil Boyfriend taldea, berriz, Andrea Pozok eta Jose Mari Unanuek osatzen dute. Konfinamendu sasoian sortutako taldea da bikote azkoitiarrarena. 2020ko apirilean grabatu zituzten beren lehen abestiak, eta urte bereko irailean publikatu zuten zortzi abestiz osatutako lehen proiektua. Ordutik, apurka-apurka, beraien bidea egiten ari dira Euskal Herrian.