Sanandresak 2022

Billabasok jantzi ditu Kintopekoen San Andres Idi Dema Sariko txapela eta manta

Sari banaketa ekitaldiko irudia. Erdian, Billabaso irabazlea. (Argazkiak: Ibon Errazu)

Atzo, astelehena, jokatu zuten sariketako azken idi dema jardunaldia Gurea pilotalekuko probalekuan. Zornotza anaiek egin zuten lanik onena, 56 plaza pasatxo eginda. Billabasok egindako markatik (58 plaza) bi plaza eskasera gelditu ziren Zallako idiak, eta hori horrela, txapela eta manta Jatabeko (Bizkaia) Billabasok jantzi zituen.

Jatabeko (Bizkaia) Billabasok jantzi du Kintopekoen San Andres Idi Dema Sariko txapela. Larunbat gauean jokatutako proban, 58 plaza eta 2,83 metro egin zituzten etxe horretako idiek, eta probak jokatu diren lau egunetan haren lana hobetu duenik egon ez denez, atzo jantzi zituen txapela eta manta Billabasok. 

Atzo, 22:00etan, jokatu zuten sariketako laugarren eta azken jardunaldia. A. Gabirondo (Orio, Gipuzkoa), I. Pagadizabal (Hondarribia, Gipuzkoa) eta Zornotza (Zalla, Bizkaia) etxeetako idiak aritu ziren nor baino nor gehiago, eta Zallako uztarriak egin zuen lanik onena, 56 plaza eta 1,73 metro eginda. Zornotza anaiak ez ziren Billabasoren lana ontzera ailegatu, baina lan txukuna egin zuten, sailkapen orokorrean bigarren postua ziurtatuz. Igone Pagadizabalen idiek, berriz, 53 plaza justu osatu zituzten, eta A. Gabirondorenek 52 plaza. 

Ipintza harriarekin aritu dira jokatzen San Andres Idi Dema Saria. Azkoitiko txapelketa, gainera, Gipuzkoako Kintopeko Txapelketarako azken proba puntuagarria izan da. Uztarri onenek abenduaren 12an jokatuko dute finala, Aian (Gipuzkoa).

Billabaso, San Andres Idi Dema Sariko txapelduna.

Hona hemen sailkapen orokorra:

  1. Billabaso (Jatabe) - 58 plaza eta 2,83 metro.
  2. Zornotza anaiak (Zalla) - 56 plaza eta 1,73 metro.
  3. Belamendi (Errezil) - 55 plaza.
  4. Oliden (Orio) - 54 plaza eta 3,6 metro.
  5. I. Pagadizabal (Hondarribia) - 53 plaza.
  6. A. Gabirondo (Orio) - 52 plaza.
  7. Txokolate (Errezil) - 51 plaza, lau zinta eta 2,43 metro.
  8. Igeldo (Ezkio) - 51 plaza.
  9. Mendigoiti (Eibar) - 48 plaza.
  10. Tubilla (Gatika) - 42 plaza eta 3,25 metro.
  11. Zumeltzu (Zamudio) - 41 plaza eta 1,95 metro.
  12. Artola (Oiartzun) - 40 plaza, zinta bat eta 2,65 metro.
  13. Maia (Aia) - 38 plaza eta 2,48 metro.

Maxixatzen da Azkoitiko euskarazko aldizkari bakarra, eta zu bezalako irakurleen babesa behar du aurrera egiteko.


Izan zaitez Maxixatzeneko bazkide