Gaur egun hemeretzi txirrindulari eta bost entrenatzaile ditu Peña Elorza txirrindulari taldeak benjamin, kimu eta infantil mailetakoak. Bi urteko etenaren ostean, joan den martxoan ekin zieten lasterketei, eta taldeak proba horietara joateko behar zuen autoa Azkoitiko Udalak erosi dio, bigarren eskuko bat. Ofizialki atzo eman zion autoa erakundeak txirrindulari taldeari, Angel Martin Kirol zinegotziaren eskutik. Udalari eskertzeko, Peña Elorza txirrindulari taldeko txirrindulariek eta entrenatzaileek familia argazkia atera zuten.
Maiatzaren 21erako txirrindularitzako zirkuitu proba prestatzen ari da Peña Elorza talde Azkoitian. 900 metroko ibilbidea izango duen zirkuitu bat atonduko dute, eta benjamin, kimu eta infantil kategoriako txirrindulariek parte hartuko dute. Mailaren arabera, zirkuituari hiru, sei edo hamabi itzuli eman beharko dizkiote parte hartzaileek. 16:30ean hasiko da lasterketa, Trenbidearen Zumarditik.