38 urte bete dira gaur, igandea, GALen mertzenarioek Ramon Oñederra Kattu errefuxiatua Baionako Kaietenea tabernan tiroz hil zutenetik, eta urteurrenaren egunean, aurteko moduan lore eskaintza egin diote azkoitiarrari. 12:00ak jotzearekin batera, parrokiaren atariko oroigarrian elkartu dira hainbat herritar, eta Kattu zenaren arrebari lore sorta eman diote. Esker hitzak izan ditu hark, beste urte batez Kattu oroitzeagatik.
Antolatzaileek, bestalde, salatu dute Espainiako estatuak ez dituela "biktima guztiak modu berean" aitortzen. Era berean, gogoratu dute hurrengo igandean, abenduaren 26an, berriz, Kattu Xake Memoriala egingo dute, Anaitasuna Kakute xake taldeak antolatuta. 16:00etan hasiko da txapelketa, Kultur Etxean, eta antolatzaileek jakinarazi dutenez, aurten presentziala izango da lehia –iaz online egin zuten–. Dena den, aurreratu dute 10-12 lagunek parte hartu ahal izango dute txapelketan, eta norgehiagokak zuzenean jarraitu ahal izango dira, taldearen webgunean (anaitasuna-kakute.wixsite.com).