Matadeixe urez bete da gaur, ostirala. Azken orduetako euriteak Urola ibaiaren igoera eragin du, eta ondorioz, herriko zenbait txoko kaltetu ditu urak, hala nola Matadeixe.
Matadeixeko kideek Maxixatzen.eus-i jakinarazi diotenez, sukaldean "ia gerrirainoko ura" dute. Urak, gainera, zenbait kalte eragin ditu han; izan ere, sukaldean zegoen guztia ondatu du, besteak beste, butano bonbonak, aulkiak eta zaborrontziak. Era berean, argindarra moztuta dute sukaldean, eta garbigailua ere urez bete zaie.
Kalteak ez dituzte sukaldean bakarrik izan, ordea. Izan ere, Matadeixeko areto nagusira ere ura sartu da, eta han "orkatiletarainoko ura" izan dute. Gainera, agetokiaren beheko aldean egon ohi diren bafleak eta bozgorailuak busti ditu urak. Euriak apaltzera egin ahala balorazio sakonagoa egingo dute Matadeixeko kideek, orduan hasiko baitira gunea garbitzen.
