2019. urtean egindako obrei jarraipena emanez, Azkoitiko Udala hainbat lan ari da egiten Zalduntxoen kalean eta Beidazarko aldapan. Duela bi urte Ertzaintzaren eraikina inguratzen duen espaloia berritu zuten, eta baita Zalduntxoen kalea 4 zenbaki pareko espaloia ere. Horretaz gain, saneamenduko ur azpiegiturak ere berritu zituzten. Orain, Zalduntxoen kaleko 1, 2 eta 3 zenbakietan eta Beidazarko aldapan ari dira lanak egiten.
Orain, zoladura berrituko dute, eta oinezkoentzat diren tarteetan irisgarritasuna hobetuko dute. Euri urak eta ur fekalak bereizteko saneamendu sarea ere berrituko dute, argiztapena hobetzearekin eta argiteria publikoa berritzearekin batera.
Aurreikusitako obren iraupena zazpi astekoa da. Udalak azaldu duenez, "ondo bidean", ekainaren erdialderako amaituta izango dira bi kaleetako lanak. Orain exekutatzen ari diren lanen aurrekontua 144.242,64 eurokoa da. 2019an egindako lanak 182.428,99 eurogatik esleitu zituen udalak.
