Italia eta hango kultura "asko gustatzen" zaizkiolako aukeratu zuen lurralde hori ikasketak egiteko. Erasmusekin Italian egon ondotik, ia urtero bidaiatu du hara. "Asko gustatzen zait, lagunak ditut han eta bidaiak ez dira oso garestiak". Han ezagututako tokietatik bat nabarmentzea oso zaila dela dio, baina esan du bat: "Iazko urrian, Liguria kostaldean, Cinque Terren egon nintzen. Bost herri txiki eta polit dira, itsasertzean zintzilik daude eta mahastiz inguratuta. Haietara joateko errepidea badago, baina ez dute irekitzen kanpokoentzat; beraz, trenez mugitu behar da. Genoba bera ere ezusteko ederra izan zen, asko disfrutatu nuen". Italiarrak oso lagunartekoak direla dio azkoitiarrak. "Bizitzaz gozatu egiten dute, eta gu bezala festazaleak eta lagunartean elkartzekoak dira". Gastronomia edota jatekoari buruz, han bertako produktuak asko zaintzen dituztela azpimarratu du Elorzak. "Bertako baratzeetako produktuak-eta asko zaintzen dituzte; edozein lekutan jan daitezke sukaldaritza tradizionaleko jakiak, ondo eginda, eta ez oso garesti”. Kultura aldetik, Italiako zinema jarraitzen du batik bat. "Italiako filmaren bat ekartzen dutenean hona, italieraz entzuteko plazeragatik bakarrik joaten naiz ikustera. Musika aldetik, berriz, Italiako musika klasikoa eta kantautore zaharrak entzun ditut batik bat". Oso zinemazalea da Elorza, eta Donostiako Zinemaldiaren azken lau edizioetan han jardun du lanean: "Zinemaldiak irauten duen garaian, hango egunkarian egiten dut lana. Zinema da nire beste pasioetako bat".
Hainbat urtez kazetaritzan lan egin ondoren, orain Donostia Turismoan ari da lanean. Egungo egoeran turismo arloa da eragin ekonomiko nabarmenena jasaten ari dena, eta hori gertutik bizi du Elorzak. "Asko aldatu da dena. Izurriaren aurretik Donostia saturatuta zegoela esaten zen, arazoa bihurtzen ari zela zenbait herritarrentzat, eta, orain, berriz, dena faltan botatzen da. Jende gutxi dabil, negozio asko ixten ari dira eta aktibitatea asko moteldu da". Donostia Turismoaren hiru ardatz nagusiak gastronomia, kultura eta ingurunearekin lotutako ekintzak direla dio. "Egoera honen aurretik, Frantziatik etortzen zen jende asko egunpasa; ondo jan, edan eta erosketak egitera. Ameriketako Estatu Batuetatik, Alemaniatik eta Australiatik ere etortzen ziren bisitariak, eta haiek jatetxeetan jateaz gainera, kulturarekin eta naturarekin lotutako ekintzei buruz galdetzen zuten: mendia, surfa...".
Hilabeteotan, bisitarien faltan, bertakoentzako informazioa moldatu dute batik bat. Donostia Turismoan barruko nahiz kanpoko jarduera egokitu dute egoerara, eta komunikazio kanalak "erraztu eta zabaldu" dituzte. "Lehen whatsappez, posta elektronikoz edota telefonoz ematen genuen informazioa. Orain, beste informazio kanal bat ere ireki dugu: txat online. Jendeak asko erabiltzen du hori".
Udari begira, txertaketak aurrera egin eta uda polita izatea espero du Elorzak. "Irteteteko eta bidaiatzeko gogoz gaude denok, eta ea uda polita dugun".
Tiramisua
Osagaiak (Zortzi lagunentzako)
- 500 gr. mascarpone gazta
- 4 koilarakada azukre
- 4 arrautza
- Amaretto likore kikara bat
- Kakao+kafe+ amaretto nahasketaren basokada bat
- Soletilla bizkotxoak edo sobao txikiak
Prestaketa
Mascarpone gazta azukrearekin eta arrautza gorringo batekin nahastu behar da. Nahasketa horri, amaretto txorrotada bat nahastu behar zaio gero.
Beste ontzi batean, lau arrautza zuringo harrotu behar dira, elur puntua lortu arte (gatz pixka batekin).
Aurretik prestatuta dauzkagun biak nahastu batera, masa uniforme bat lortu arte.
Ontzi baten hondoa bizkotxoekin estali behar da, eta ondoren, bizkotxo horiek ondo busti behar dira kakao, kafe eta amaretto nahasketarekin.
Aurretik eginda dagoen nahasketa edo masa bustitako bizkotxoen gainetik bota behar da.
Bukatzeko, kakao hautsarekin apaindu behar da. Hotza zerbitzatu behar da; beraz, aurretik hozkailuan edukitzea komeni da. On egin!