Britania Handiko Simon West zuzendaria Sin limites telesaila grabatzen ari da, eta hainbat sekuentzia Santa Klara komentuan errodatuko dituzte. RTVEk eta Amazon Primek ekoitziko dute ikus-entzunezkoa, eta Elkanoren eta Magallanesen istorioa izango du ardatz. Elkanok marinelekin duen elkarrizketa bat zein Sevillako portuko (Andaluzia, Espainia) taberna batean girotutako eszenak grabatuko dituzte Santa Klara komentuan.
Proiektua joan zen otsailean aurkeztu zuten, eta duela gutxi jo zuten Azkoitiko Udalera komentuan grabatzeko baimen eske. Azkoitian ez ezik, Hego Euskal Herriko beste hainbat txokotan ere egingo dituzte grabaketak, ekainera bitartean. Aurrez, hainbat lan entzutetsu egin ditu Westek; besteak beste, Lara Croft eta Con Air egin ditu. Udalak adierazi duenez, 160 lagun inguru batu daitezke grabaketak iraungo duen bizpahiru egunetan, eta "logistikari lotutako eragozpenak" eragin ditzake egoerak.