Gipuzkoako Eskolarteko Bertsolari Txapelketan parte hartzen ari da Naia Arrizabalaga

Ostiraleko saioan abestu zuten bertsolariak –eskuinetik bigarrena da Arrizabalaga–. (GBE)

Azkoitiarrak ostiraleko Oñatiko saioan abestu zuen Beñat Mateosekin, Ekain Tolaretxipirekin, Maide Garmendiarekin eta Oibar Olanorekin batera. Epaimahaiak hala erabakita, Maider Garmendia izan zen nagusi. Hiru kanporaketen irabazleak nahiz puntuazio altuena duten beste hiru sailkatuko dira finalera.

Ostiralean hasi zen Gipuzkoako Eskolarteko Txapelketa. Bat-batekoa lehiak hiru kanporaketa eta finala izango ditu, eta guztira hamasei bertsolarik parte hartuko dute. Horien artean da Naia Arrizabalaga azkoitiarra. Hark ostiraleko saioan abestu zuen Oñatiko Larrain-Gain elkartean, Beñat Mateosekin, Ekain Tolaretxipirekin, Maide Garmendiarekin eta Oibar Olanorekin. Unai Belaustegik jarritako ariketak egin behar izan zituzten horiek, eta epaimahaiak hala erabakita, Maider Garmendia izan zen nagusi.

Bigarren saioa ostiral honetan izango da Ikaztegietako Herrigintza elkartean, eta beste bost bertsolari ere ariko dira kantuan: Xabier Albizu, Ane Zubia, Irati Arakistain, Hodei Munduate nahiz Joar Garate. Saroi Jauregik egingo ditu gai-jartzaile lanak. Hirugarren kanporaketa, berriiz, Ereñozuko Ur-Mia elkartean izango da martxoaren 13an. Amets Aizpurua, Ane Peritz, Jon Mendiluze, Nerea Isusi, Olatz Zuazubiskar eta Uxue Ostolaza ariko dira lehian.

Hiru kanporaketetako irabazleak nahiz puntuazio altuena duten beste hiru bertsolari sailkatuko dira finalera; saio hori Lasturko tabernan izango da apirilaren 3an. Saio guztiak afalostean izango dira eta afaltzeko txartela eskuratu nahi duenak bertsosarrerak.eus webgunean du horretarako aukera. Sarrerak saioaren aurreko ostegun eguerdira arte izango dira eskuragarri.

Idatzizko txapelketa

Idatzizko txapelketarako saioak ere jarri dituzte dagoeneko Gipuzkoako Bertsozale Elkarteak eta Ikastolen Elkarteak. Hain zuzen ere, goizez egingo dituzte zortzi saio martxoaren 10etik 27ra bitartean. Hitzordu horietan gaia emanda bertsoak sortzeko aukera izango dute gaztetxoek, eta ondoren, bertso saio didaktiko batez gozatzeko aukera izango dute. Azpeitian egingo dute saio horietako bat; hain zuzen ere, martxoaren 25ean izango da Basazabal jauregian.

Maxixatzen da Azkoitiko euskarazko aldizkari bakarra, eta zu bezalako irakurleen babesa behar du aurrera egiteko.


Izan zaitez Maxixatzeneko bazkide