Maiatzaren 17koa, ostirala, izango da baratza jardunaldietako bigarren hitzaldia. Gorka Torre Behorlegiko (Behe Nafarroa) nekazariaren izango da solaskidea. Bere baratzean sortzen duen elikadurarekin bizitzeko aski duen nekazaria da Torre. Duela zortzi urte hasi zuen beharrezkoa duen elikadura bere baratzean sortzeko proiektua, eta lortu du helburua. Hainbat baratza ditu Behorlegin zehar, eta dozenaka elikagai sortzen ditu urte osorako. Garaian garaikoa jaten dute, hozkailuen beharrik gabe. Elektrizitatearen kontsumo arduratsua defendatzen du, gainera, Torrek.
Jardunaldietako azken hizlaria, bestalde, Jakoba Errekondo izango da. Maiatzaren 31n, ostirala, emango du hitzaldia agronomista eta paisajista usurbildarrak. Ezaguna da hainbat hedabidetan landare gaien inguruan parte hartzeagatik. Hala nola, Argia aldizkarian, Euskadi Irratiako 'Landaberri' saioan, eta www.bizibaratzea.eus webgunean. Elhuyar Zientzia Aldizkarian ere kolaboratzaile gisa aritu da. Urte luzez Landa Garapeneko herri txikien biziberritze proiektuetan jardun du teknikari gisa, baita proiektuak sortzen, diseinatzen eta zuzentzen.