Eguberri jaien atarian, urtero legez, Maratoi Solidarioari ekin dio EITBk, ikus-entzuleen ekarpenei esker, ahalik eta diru gehien lortzeko kausa on baten alde. Biltzen diren sosak biriketako minbizia ikertzeko erabiliko dira, omen. Datak, egia esan, ezin egokiagoak dira. Gabonak laster, samurragoa dugu bihotza eta zabalagoa patrika. Eta hala, epopeia txikiz argituko dizkigute argi urriko egunok, begiak betetzekoak guztiak: haur batek itsulapikoa hautsi eta bertan zuena eman du; harako alargunak, berriz, ehun euro eskaini ditu, eta egin kontu hilean zazpiehun euroko erretiroa duela. Egoki erabiliko direnak, noski. Heroi txikien balentria handiak, egiazko Gabonetako ipuinak.
Auzokoa hilko dut, edota lagunik handiena, etxekoren bat ostean. Eta hamaika ezezagun, hori seguru. Baita neure burua ere, deskuidatzen banaiz. Ez dakit noiz, ez hala gura dudalako, eta ez pistolaz, labanaz edo esku hutsez. Baina banan-banan jausiko dira. Hil baino, ez dut ezer egingo hala gerta ez dadin. Nola, horixe da badakidana. Beti gogorarazten didate nola. Aurten, airerik ez emanda behar duenari.
Maxixatzen da Azkoitiko euskarazko aldizkari bakarra, eta zu bezalako irakurleen babesa behar du aurrera egiteko.
Izan zaitez Maxixatzeneko bazkide
Izan zaitez Maxixatzeneko bazkide