maxixatzen.eus

Udalaren arabera «bide onetik» ari dira birziklatzen azkoitiarrak

  Gizartea  Azkoitia

2018ko lehen seihilekoan 2.270.071,7 kilo hondakin jaso dira guztira Azkoitian. Horietatik 1.421.399,1 kilo berreskuratu dira gaikako bilketaren bidez, hau da, %62,6. Datu horiek mahai gainean izanda, Udalak azpimarratu du Azkoitia «bide onetik» doala.

Udalaren arabera «bide onetik» ari dira birziklatzen azkoitiarrak
Lujan kioskoan eskura daitezke poltsa biodegradagarriak, besteak beste. | Ikusi handiago | Argazki originala

 

Udalak azaldu du helburua gaikako bilketako datuak ahalik eta gehien igotzea dela. Hori lortzeko, Udalak berriro aterako ditu kaleetara modu bisualean edukiontzi bakoitzera zer zabor mota bota erakusten duten dorreak. Birziklatu zalantzarik gabe leloa du kanpainak. Kanpainak herritarren konpromisoa eta hondakinen kudeaketa egoki baten inguruko sentsibilizazioa bilatzen ditu, sortutako zabor kopurua murriztearen, berrerabiltzearen eta birziklatzearen garrantziaz ohartaraziz. Izan ere, «kudeatu beharreko hondakin kopuru ikaragarriaren aurrean, ingurumen-inpaktua txikiagotzea, neurri handi batean, herritarren borondate onaren eta inplikazio mailaren esku» dagoela gaineratu du Udalak.

Sei hilabetetan batez beste biztanle bakoitzak 195 kilo hondakin sortu ditu, eta horietatik 122 kilo lirateke berreskuratu direnak. Ordea, kontutan hartu behar dela dio Udalak aipatutako zifrek kaleko zein industriaguneetako edukiontzietan jasotako hondakinak hartzen dituztela barne: «Izan ere, pasa den uztailera arte industriaguneetan gaikako bilketarako edukiontzia egon bazeuden arren, hondakin askok edukiontzi grisean amaitzen zuen. Lantegian edo fabrikan bertan kartoia bakarrik biltzen zen. Esan daiteke, beraz, gaikako bilketa industria eremuetan uztailetik hona bihurtu dela eraginkorra, uztailean hasi baitziren hondakin mota bakoitzaren bilketa pertsonalizatua egiten. Ordutik, fabrika edo lantegi bakoitzak hondakin mota bat ateratzen du bertatik hondakin horri dagokion kamioia pasatzen denean. Aldaketa horrekin orain arteko adierazleak aldatzea aurreikusten da, gaikako bilketa bidez jasotzen den portzentaiak eta kopuruak handituz. Oraindik, ordea, ez dago azken hilabete hauetako daturik», azaldu du Udalak.

Udalak herritarrak zoriondu ditu

Udalak herritarrak zoriondu ditu «egunez egun zaborrak dagokion tokira botatzerakoan egiten duten ahaleginarengatik» eta bide horretan jarraitzeko eskatu die. Horrekin batera, «kontu handixeagoarekin ibiltzeko» ere eskatu die hondakin organikoen kasuan, «ez dadin konpostaje prozesua arriskuan jarri»: «Orain arte, ondo egiten ari zen, baina azken asteetan arduragabetasun gehiagorekin jokatu denaren zantzuak antzeman dira eta horrek ahalegin kolektiboa bertan behera botatzen du. Ohiko erroreetako bat da hondakin organikoa dagokion edukiontzi marroira botatzea baina poltsa biodegradagarria erabili beharrean, beste edozein poltsatan botatzea», dio Udalak.

Jakina denez, Azkoitian doan eskura daitezke poltsa biodegradagarriak ondorengo establezimenduetan: Odazpi kafetegia (Anaitasuna plaza,1), Elurre kafetegia (Julio Urkixo 20), Lujan kioskoa (Kale Nagusia 72) eta Amalur bideoak (Julio Urkixo 13).

Zalantza sortuz gero, ingurumen sailetik aholkatzen da hondakina edukiontzi grisera botatzea, errefuxaren ontzira, hain zuzen. «Helburua da –dio Ana Azkoitia zinegotziak- egunetik egunera hobetzen joatea. Asko aurreratu dugu eta orain erronka Azkoitian, eta dugun informazioaren arabera, beste ondoko herrietan eta baita Gipuzkoan ere, biltzen den materia organikoan inpropio (material desegokia) kopurua murriztea da. Ez gaitezen galdu zeren denok gara arduradunak. Erantzunkidetasunik ezean, ezinezkoa da emaitzak mantentzea edo hobetzea. Hobetu ditzakegula erakutsi beharra daukagu eta badut lortuko dugun konfidantza».

Mankomunitateak ikuskapenak egiten jarraituko duela gaineratu du Udalak, «gune bakoitzari dagokion neurriak hartu ahal izateko».

Taula honetan ikus daiteke 2018ko lehen seihilekoan Azkoitian jaso den hondakin kopurua:

 

2018

 

Bildutako hondakin kopurua kilotan

 

Gaikako bilketa bidez jasotako hondakin kopurua kilotan

Urtarrila

401.436

253.102 (%63,05)

Otsaila

350.173

221.549 (%63,27)

Martxoa

357.431

217.224 (%60,77)

Apirila

411.019,88

266.286,76 (%64,79)

Maiatza

391.153,82

245.444,39 (%62,75)

Ekaina

358.858,15

217.793,02 (%60,69)

Guztira

2.270.071,7

1.421.399,1 (%62,60)

Erantzunak

Erantzuna | #1

Nahikue deu, zeun buruere eztezute engañatzen hainbeste gezurrekin

http://urolakosta.hitza.eus/2014/11/12/azkoitia...

Erabiltzailearen aurpegia Erantzuna | #2

Herritarrak zoriondu zergatik? Mankomunitatea %70eko helburura iritsi da, eta Azkoitia da herri bakarra helbura ez duena lortu. Orain arte azpeitiarrekin partekatzen genuen "ohore" hori, haiek Kurutziako txakurrena egin digute, "harrapau eta pasau". Gu %80tik (2014ko urria) %60ra jaitsi (2018ko ekaina), zoriondu beharrean autokritika egitea hobe legoke.

Erantzuna | #3

Hondakinen gaikako bilketan, 2014ko urrian %80,64 tasara iritsi ginen (gogoratu une hartan "sistema mistoa" ezarrita genduela herrian). Lau urte luze igaro dira, zaborrak jasotzeko sistema aldatu ere bai, eta 2018ko ekainean %62,6 tasara jaitsi gara (sistema berriarekin) eta hala ere Udalak dio Azkoitia bide onetik doala eta herritarrok zoriondu gaitu. Ea datorren urtean %ko tasa hori jaisteko gai gean (%50 edo %40ra) eta orduan Udalak, berriz ere, zorionduko gaitu eta, zenek daki, plakatxo bat ere oparituko digu azkoitiarroi, txintxo portatu garelako.
Hauxe besteik ez ginean beher!

Erantzuna | #4

Udalak arrazoia du. Bide onetik goaz. Erraustegia behar izateko bide onetik...

Erantzuna | #5

Gogoz jakingo nuke Azkoitiko herrian sortutako hondakinetik ze % ko kopurua joaten zaizu gure ibaitik itsasora!!

Erantzuna | #6

Joaten zaigu!!

Erantzuna | #7

Reziklatze tasa ixe 10 puntu bajau, ta herritarrak zoriondu? Bejondeizuela. Erraustegiari jaten ematea izango da zuen helburue, ta bai, zorionak zuei, bide onean ai zeate. Gora zuek! Xanuek gea azkoittiarrak, baino tontuk ez, eh!

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa