maxixatzen.eus

Joseba Diaz: «Gustura nago aurten ematen ari naizen mailarekin»

  Kirola  Azkoitia

Pistan eta errepidean ere korrika aritzen da, baina mendiko lasterketetan du eskarmentu handiena Joseba Diaz Lopezek (Azkoitia, 1995). Horren adierazle dira azkenaldian lortutako sariak. Besteak beste, pasa den abuztuan Panticosako (Huesca) Trail Valle de Tena proba irabazi zuen. Hona hemen bere kirol ibilbideari buruz Maxixatzenek egindako elkarrizketa:

Joseba Diaz: «Gustura nago aurten ematen ari naizen mailarekin»
Joseba Diaz, Trail Valle de Tena probako podiumean. | Ikusi handiago | Argazki originala

 

Zein lasterketetan parte hartu duzu aurten?

Otsailean hasi nintzen lehiatzen, eta ordutik hainbat kilometro bertikal, maratoi bat eta distantzi ertaineko lasterketak (20-30km) egin ditut. Besteak beste, honako herri hauetan lehiatu naiz: Zaramilloko Apuko kilometro bertikalean (Bizkaia), Azpeitian, Asturiasen, Leonen, Kanaria uharteetan eta Miranda Ebron (Burgos). Espainiako kopako lehian nabil, beraz, lasterketak Espainiako hainbat lekutan izan dira. Hala ere, oso urruti badira ez naiz joaten eta gertuago dauden lasterketetara joaten naiz.

 

Gainera, lehen postuetan zabiltza.

Bai; gustura nago aurten ematen ari naizen mailarekin. Ez nuen espero horrelako emaitza onak lortzea. Gainera, postuetaz gain, neure sentzazioak ere asko hobetu dira.

 

Pasa den abuztuan Trail Valle de Tena proba irabazi zenuen.

Urteak daramatzat Pirinioetara joaten, eta oso gustuko ditut bertako mendiak eta herriak. Lasterketa hori Panticosa (Huesca) izeneko herrixkan izan zen. Niretzat badu zerbait berezia leku horrek; izan ere, inguru horietan igo nuen nire lehenengo 3.000 metroko mendia.

 

Espero al zenuen proba irabaztea?

Entrenamenduak ondo joan ziren; beraz, espero nuen aurrean ibiltzea, baina irabaztea beti da zaila.

 

Proba gogorra al da?

Distantziari eta desnibelari dagokienez ez da oso gogorra. Gogortasuna mendien altuerak eta inguruak berak ematen dio.

 

Datozen hilabeteetan beste lasterketaren batean lehiatuko al zara?

Denboraldia luzea izan da, eta hilabete barru amaituko dut. Irailaren 24an Monkayoko (Soria, Espainia) kilometro bertikalean parte hartuko dut eta urriaren 7an Madrilera joango naiz Espainiako Kopako azken proban lehiatzera.

 

Zein helbururekin joaten zara lasterketetara?

Ahal dudan mailarik altuena ematera eta gozatzera.

 

Mendiko probetan aritzen al zara beti?

Iazko abenduan 3.000 metro pistan egin nituen, bederatzi minututik jaisteko asmoz. Aurreko urteetan krosak ere egin izan ditut, baina orain mendian bakarrik nabil. Denetarik egitea gustatzen zait, lasterketaren arabera modalitate bat edo beste.

 

Zer egin behar da emaitza onak lortzeko?

Lana eta lana. Gogor entrenatu, janaria zaindu…

 

Nolako prestaketak egiten dituzu?

Aurtengo emaitzak Josu Larrañaga "EPI" azpeitiarrak jarritako entrenamenduei esker lortu ditut. Berak planifikatzen du asteroko lana eta denetik eginarazten dit: mendiko nahiz errepideko lan saioak, pisu lanak…

 

Muturreko lasterketetan parte hartzea ez dela goraipatu behar uste dute batzuek. Zer iritzi duzun horren aurrean?

Egia da antolatzaile askok burua galdu dutela eta zentzurik gabeko muturreko probak antolatzen dituztela. Jendeak ere zentzua galdu du, inongo prestakuntzarik gabe muturreko lasterketetan sartzen dira eta gero arazoak etortzen dira. Orain dela urte batzuk maratoi bat amaitzea izugarria zen, gaur egun, ordea, maratoia distantzia motzeko lasterketatzat hartzen dute batzuek.

Bestalde, prestatuta dagoen jendeak, esperientzia duenak, entrenamendu egokia eraman duenak… ez du inolako arazorik horrelako lasterketa batean parte hartzeko.

Azkenaldian mendiko maratoiek izugarrizko oihartzuna dute. Kilian Jornetek eta beste askok kalte handia egin dutela uste dut. Izan ere, beraiek erraz egiten dituzte horrelako lasterketak, eta askok uste dute erreza dela. Baina lorpen horien guztien atzetik entrenamentu gogorrak daude eta, batez ere, fisiologia paregabea.

 

Gorputzari eman dezakeena baino gehiago eskatu al diozu inoiz?

Bai; neu ere zentzua galduta ibili nintzen hasiera batean. 18 urterekin eta inolako prestaketarik gabe 65 kilometroko mendi larterketa bat egin nuen. Amaitzea lortu nuen, baina egoera nahiko txarrean. Ordutik asko ikasi dut, eta orain ez nahiz joaten horrelako lasterketetara ez baldin banago prest.

 

Zenbat ordukoa izan da egin duzun probarik luzeena?

11 ordu eta 65 kilometrokoa.

 

 

Amets bat | Horrela jarraitzea

Janari bat | Pasta, edozein eratan

Mendi bat | Kakute

Herri bat | Azkoitia

Urtaro bat | Udaberria

 

Erantzunak

Erantzuna | #1

Aurreko artikulu batean neuk bota nuen ez zirela horrelako probak goraipatu behar. Poza eman dit parte hartu duen batek ere antzeko zerbait esatea.

Erantzuna | #2

Horri esate zoat nik nai dekena ulertzie, hik esan huan gorputzentzat txarra dala...ta ez dila goraipau ber. Nun esateik ba honek hori????
Ez daukek arrazoirik ta badakik...baino hori onartzie baino...alde earra bestik esateiabena heure era ulertzie.
Informazixue manipulatzen ari haiz, ta irakurliek nahasten.
Oindik eztek idatzi zertan dan txarra gorputzentzat...zai gatxaudek...ta ez badakik halakoik ez esan, zeatik iritzi bat emateko arrazoiek mahai gainien ipini ber izetettuk, ez zea, bota goue emandakue aztarranipe zertaz ari haizen ta aurrea.
Josebak esan dikena dek prestakuntza egokixe ber dala ta edozeinek ez dikela balixo kirol exremo hau etteko. Ta egun batetik bestea ez daola hola ibiltzeik.
Adibide garbi bat ipinikoiat, ta honekin bukau etten diat gai honekin zeatik hirekin alperrik ari naukela iruitze zitek ta;
Festak, earrak dittuk, danok ondo pasatzie nai izeteiau, ondo, baino batzuk alkohol gexegi eran ta txarrak jartzen dituk, edozeini latie ematen... batzuk koma etilikukin anbulatoxoa...txixe edozein lekuten etten...gauien kalin diarka...baino, festak txarrak al dittuk??? Ez al ditxiau goraipau ber gure herriko festak???
Pertsona batzuk buruipe ibiltzen dittukelako ezin diau generalizau, ta txarrenakin geldiu.
Ta hau bizitzan orokorrin pasatzek arlo danetan.
Hala, oin nai dekan bezela hartu eta ulertu hau.

Erantzuna | #3

Kaixo Belarralepo:

Arrazoi duzu, neure erara interpretatu dut Josebak esandakoa, baina erantzun honetan nik esandakora hurbiltzen zelakoan nago:

Muturreko lasterketetan parte hartzea ez dela goraipatu behar uste dute batzuek. Zer iritzi duzun horren aurrean?

Egia da antolatzaile askok burua galdu dutela eta zentzurik gabeko muturreko probak antolatzen dituztela. Jendeak ere zentzua galdu du, inongo prestakuntzarik gabe muturreko lasterketetan sartzen dira eta gero arazoak etortzen dira. Orain dela urte batzuk maratoi bat amaitzea izugarria zen, gaur egun, ordea, maratoia distantzia motzeko lasterketatzat hartzen dute batzuek.

Bestalde, prestatuta dagoen jendeak, esperientzia duenak, entrenamendu egokia eraman duenak… ez du inolako arazorik horrelako lasterketa batean parte hartzeko.

Azkenaldian mendiko maratoiek izugarrizko oihartzuna dute. Kilian Jornetek eta beste askok kalte handia egin dutela uste dut. Izan ere, beraiek erraz egiten dituzte horrelako lasterketak, eta askok uste dute erreza dela. Baina lorpen horien guztien atzetik entrenamentu gogorrak daude eta, batez ere, fisiologia paregabea.



Festak buruz zer esan? Festak goraipatu behar direla, baina denok gabiltza bertan sortzen diren aldrebeskeria horiek nola gutxitu.

Iruditzen zait kirolaren gaiak ematen duela eztabaida sano baterako. Maxixatzenek antolatzen badu ni prest mahai inguru edo dena delakora azaltzeko. Nahi baduzu han hitz egingo dugu.

Ondo segi

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa