Auzokon ez dugu inor euskalduntzeko asmorik, euskarara hurbiltzeko baizik eta jasotzen den horrek komunikatzeko balio izatea bilatzen dugu. Ez dugu euskara zuzena bilatzen, eta ulertzen den heinean ontzat ematen dugu. Euskaraz komunikatu nahi dugu, euskaraz elkar ezagutu. Euskararekin jolastuz, giro ludikoan, euskaraz ez dakiena euskarara hurbildu nahi dugu eta hizkuntza desberdinetako herritarrak harremanetan jarri.
Euskararen munduan berria denak lehenik eta behin, entzuteko premia dauka, hori baita hizkuntza bat "naturaltasunean" ikasteko lehen urratsa: entzumena lantzea. Entzun, errepikatu eta berriz entzun. Patxadaz eta giro lasaian, lagun arteko giroan aritzen gara.
Auzokoko taldeak sarrera libreko eremuak dira eta sailkapen bakarra euskaraz hitz egitea edo ez egitea da. Beraz bi perfilak dira beharrezkoak Auzoko taldeak osatzeko: euskaraz bizi diren herritarrak eta euskarara hurbildu nahi duten herritarrak.
Animatu euskararekin jolastera, eta zatoz Elkargunera ostiraletan, 10:00etatik 12:00etara. Maite Rodrigez izango da aurrerantzean Auzokoren dinamizatzailea, eta herritarrak animatzen ditu egitasmoan parte-hartzera.