KOADERNO BERDEKO POSTALAK-15
Jon Andoni Martin / Jauregiko txondorra
Aizan, Olentzero,
gomendio labur batzuk egin nahi dizkinat,
hire lan neketsuak errazte aldera.
Emaien ikazkinei urre betierekoa,
intsentsua gustatzen zaionari,
mirra, aldiz, zer den benetan dakienari,
eta erregeei behin betiko erretirorako ikatza.
Emaien saria zigortutako errugabeei,
eta zigorra merezi gabe saritutakoei;
hustu hitzan ostutako diruz betetako zakuak
eta leporaino bete lapurrek hustutakoak.
Eta, azkenik, emaigun helduoi
bost urteko haurraren ilusio gordina
eta bost urteko haurrei emaien
beste bost urtez higan sinesteko poza.
P.D.: Emakumezkoen hikaz egin dinat, gure mitologiako irudi gehienak hika maite duten emeak direlako,
eta niretzako aldi berean eme eta gertuko haudalako.
Aitor Arruti Rezabal