Nire bizitza osoa
gezur handi bat izan dela konturatzean,
nire gelan sartu
eta negarrari eman diot.
Urte guzti hauetan
gezur handi baten atzean
ezkutatzeko hautua egin dut,
egia mingarri bati
aurre ez egiteagatik.
Bapatean nire lagun batek
esandako hitz batzuk gogoratu,
eta segituan jabetu naiz
urte mordoan ezkutatzen
saiatu naizen gezur mardulak,
egia mingarriak baino
min handiagoa eman didala.
Nire gelatik irten,
komunean sartu
eta negarrez jarraitzen dut.
Ez dakit zer egin.
Zalantzaz beterik nago.
Nire bizitzak
porrot egin duela konturatzean,
komunetik irten,
jantzi eta kalera joan naiz.
Kalean nire lagunarekin
topo egin dudanean,
hauxe esan diot:
“Lehengoan zergatik esan zenizkidan
hitz malapartatu haiek?
Bizitza izorratu didazu!”
Laguna harrituta geratu da.
Ez daki zertaz ari naizen ere!
Baina oraingoan ere,
nire ezkutatzeko joerari eutsiz,
errazena egin dut:
Errua gainerakoei egotzi.
Azkenean nire gezurraren errua
nire lagunari leporatu nahi diot.
Posible al da?
Maite Arrate