EAJren oharra: «Aizpurutxokoa kasu puntuala izan da, eta Udalari dagokio erantzukizunak eskatzea eta dagokion neurriak hartzea»

Erabiltzailearen aurpegia

Azkenaldian herrian suertatuko gertakizun tamalgarriaren inguruko gure gogoetak azalduko ditugu ohar honetan:

Azken urteotan, zaborren kudeaketa izan da herri honetan eztabaidarik sutsuenetariko bat. Zilegitasun osoz batzuk sistema baten eta  besteak beste  baten alde ibili gara. Hasiera batean, denok helburu bakarrarekin: ahalik eta gehien birziklatzea.

Kronologia labur bat eginez, Azkoitian 2004. urtean, gaikako bilketaren datua %19koa zen, eta  Gipuzkoan, berriz, %26koa. Garai honetan hasi zen Azkoitiko Udala gaikako bilketarekin,  esperientzia pilotu baten baitan organikoa jasotzen edo Garbiguneko zerbitzua eskaintzen.

Horrela, 2013. urtean, azkoitiarrok %33 ko gaikako bilketa egitera iritsi ginen, hau da, 4.691 Tn zaborretik, 1.571 Tn gaika jaso ziren.

2014. urtean, EAJ-PNV oposizioan geunden arren, gaikako bilketaren oinarriak onartu genituen  EH BILDUren izenean Udal gobernuan zeudenekin batera, ahalik eta azkarren %70eko gaikako bilketa lortu eta jasotakoaren kalitatea bermatzeko xedez, besteak beste.

2017. urtea iritsi da, eta gaur da eguna azkoitiarrok %62 gaikako bilketa bidez jasotzen duguna, hau da, ia-ia bere garaian, hau da, 2014an, plenoan, gehiengo oso-oso zabal batek onarturiko helburura iristen ari gara.

Kalitateari buruz, berriz, duela bi aste, Udalak martxan jarri du kanpaina berri bat, hau da, organikoa hobeto jasotzeko edukiontzi berriak jarri ditu eta gehien kostatzen zaigun gaiakako  bilketan, enbasetan alegia, zer eta nola jaso behar den adierazteko etxolak ezarri ditu.

Ikastetxeekin ere urte luzez ari da Udala lanean, Agenda 21aren barruan, umeetatik gaikako  bilketa bultzatzeko ahaleginetan, ikastetxe desberdinetako irakasleekin batera.

Gauzak horrela, gure ustez zaborren kudeaketak eta bereziki gaikako bilketaren gaiak, denon helburua %70 gaikako kalitate oneko bilketa lortzea bada, ez du izan behar egitik urrun dagoen ikamikarako argudio eta aurkari politikoa edozein preziotan kritikatzeko arrazoi. Ez baigaude elkarri mokoka jarduteko karrera batetan baizik eta zabor gutxiago sortu, gaika hobeto jaso eta gehiago birziklatzeko saiakaera kolektibo batetan. 

Aizpurutxoko kasua, batzuk zaborren botatzea gaizki egiten dutelako, herri guztiko gaikako  bilketa ez kontaminatzeko asmoz zabor guztia batera jaso behar izan den, kasu puntual bat izan da. Ez gehaigo eta ez gutxiago. Udalari dagokiolarik erantzukizunak eskatu eta bere kasuan dagokion neurriak hartzea, aurreko astean Javier Zubizarreta alkateak argi eta garbi esan zuen moduan.  

Edozein kasutan, ordea, azkoitiarrok orohar, oso ondo ari gara gaiako bilketan. Hortxe dago %62ko gaikako bilketa datua. Eta guk, EAJ-PNVtik hori balorean jarri nahi dugu herritar guztiak zorionduz eta azkoitiarrok aspalditik hartuta dugun ingurumenaren aldeko konpromisoari tinko eutsi diezaiogun eskatuz.

Udalak egin berri duen moduan, herritarroi berriro ere jakinaraziz, gaikako bilketa zer eta nola  egin behar dugun. Horrela bakarrik izango baitugu kalitatezko jasoketa eta birziklai tasa gorena, duela urte batzuk elkarrekin adostu genuen %70ko gaikako bilkataren helburua betez. Oso hurbil gaude. Animo eta aurrera beraz!