Ongintzan, irakaskuntzan, emakumeen prestakuntzan eta abertzaletasunaren hedapenean lanean aritu zen hainbat urtez Emakume Abertzale Batza, frankismoak zapuztu zuen arte. Gaur, maiatzak 7, ehun urte bete dira talde hura sortu zenetik, eta Berria-ko Gotzon Hermosilla kazetariak talde haren historia hizpide duen erreportajea landu du. EABko kide zen, besteak beste, Julene Urzelai (Azkoitia, Gipuzkoa, 1912 Caracas, Venezuela, 1983), eta beste hainbat emakumerekin hitzaldiak ematen aritu zen hura mitinetan eta batzokien inaugurazioetan.
Haren iloba Tegi Urzelaik (Azkoitia, Gipuzkoa, 1945) azaldu duenez, Caracasetik Euskal Herrira itzuli zen egun batean —gerra ostean Caracasera erbesteratu zen Julene Urzelai— ezagutu zuen izeba: "Lehenengo aldiz etorri zenean, ni umea nintzen, eta ez daukat gogorapen askorik, baina geroago hobeto ezagutu nuen. Oso emakume alaia zen: agurtzeko, 'gero arte' esan ohi zuen, handik Caracasera joan behar bazuen ere".
Honako lotura honetan irakur daiteke Berria egunkariak egindako erreportajea, osorik.