Mikel Arregik azken zortzi urteak egin ditu Anaitasunan, eta hainbat funtzio bete ditu: entrenatzaile moduan hasi zen, ondoren Kirol Zuzendaria ere izan da, eta baita Zuzendaritzako kidea ere. Egin duen lana eskertu nahi izan zioten Txerloian elkartu zirenek.
Lagunek egindako bideo bat ikusiz hasi zuen omenaldia "Ispizuk", eta ondoren zelaian isilean zain ziren denek, txalo eta irrintzi artean hartu zuten. Bere bi ilobekin batera, Anaitasunako jokalariek egindako pasilloan aurrera egin zuen, gurasoak zeuden lekura arte. Ondoren, aurreskua jaso zuen omenduak eta Iraitz Kortak, klubean bere lekukoa hartuko duenetako batek, bertso batekin borobildu zuen omenaldia.