Aretxabaletak gauza bera eginez ekin dio partidari. Erdiko atzelariak ezkerrez egindako pase luzea eskuin hegaleko jokalariak kontrolatu ostean, area barrura egin du erdiraketa eta aurrelariak buruz errematatu ondoren markagailuan bat eta hutsekoa jarri du markagailuan. Lehen minutua betetzerako egin dute gola etxekoek. Nagusi izan dira lehen zatian etxekoak eta minutu gutxiren buruan bigarrena egitetik gertu izan dira. Erremateak ordea zutoinean jo du.
Anaitasunak, berriz, bi aldeetako hegalak baliatu ditu arriskua sortzeko. Lehena zelai erdian Godoyk berreskuratutako jokalditik hasi da. Ioannes Garatek pasea egin dio azpitik Mikel Arzalluzi eta honen erdiraketa Ioritz Mendizabalek errematatu du ezkerrez, baina zuzenean kanpora joan da. Antzeko jokaldi batean ere gertu izan dute gola gorrixek. Ioannesek egindako erdiraketa Iñigo Arzalluzi iritsi zaio bigarren zutoinean eta atzelari bat atzean utzi ostean gutxigatik kanpora joan zaio jaurtiketa gurutzatua.