Joan den larunbatean Torrelavegako (Kantabria) IV. Open Azkarra jokatu zen. 151 jokalarik parte hartu zuten, eta lau azkoitiar izan ziren Anaitasuna-Kakute Xake Taldeko ordezkariak. Txapelketa Rodrigo Vasquez txiletarrak irabazi zuen, 9 puntutik 8 lortu zituen, Neuris Delgado paraguaitarrarekin berdinduta eta Jaime Santos Latasak puntu erdira jarraitu zion, Anaitasuna-Kakute taldeko jokalariekin batera, ekainean gure herrian jokatu zituen partiden ostean. Jose Joaquin Larrañagak 71. postuan bukatu zuen 4,5 punturekin eta Del Rio izan zuen aurkari. 72. postuan amaitu zuen Manuel Paredesek, honek ere 4,5ekin, eta txapeldunordearen aurka jokatu zuen, N.Delgadoren aurka. Anibal Fernandez ere 4,5 punturekin 79. postuan sailkatu zen, eta Imanol Larrañaga 100. postuan 4 punturekin.
Oso esperientzia ona izan da, Azkoititik kanpo eta beste aurkari batzuekin txapelketak jokatzen hasteak maila asko hobetzen duelako. Gainera, talde-giroa eta bazkideen arteko harremana indartzen ditu, eta hori oso garrantzitsua izango da datozen asteetan gure jarduerak garatzeko.