Negu gorriak kolpe gordinak jo ohi ditu, eta ez bakarrik eguraldia edo argi falta laguntzaile izaten duen astinaldi kaltegarrietan. Negu ilunean kukutzen da askotan Herio, eta hainbat lagun eramaten dizkigu urtero gure ondotik. Hark bisitatzen gaituenean, ez da koplatarako gogorik gelditzen. Hain zuzen, Santa Ageda eskearen bezperan hil zen Juan Karlos Merino idazlea, kantuko makila hotsak bedatseko bizi berriari dei egiten dion eguna baino lehentxeago. Maxixatzenen lagun, lankide eta gogaide aparta izan dugu Juan Karlos gure elkartearen historia osoan, hainbat eratako lanetarako eskaerei baiezkoa eman diena beti. Ez dauzkagu ahazteko haren samurtasuna, euskararen aldeko kemena, ideia biziak eta izaera eskuzabala. Heriotzaren ondorengo egunetan haren omenez argitaratu diren mezu eta artikuluak dira horren guztiaren erakusgarri nabarmen. Maxixatzeneko kideok gure esker ona erakutsi nahi diogu nolabait haren memoriari, hura maite duten guztiekin bat eginez; hark idatzitako ipuin luze eder bat erabiliko dugu horretarako. Martxoan hasita, "Beste bizitza batean" izeneko ipuina atalka argitaratuko dugu Webarruen ostiralero. Orain urte batzuk, halaxe argitaratu genuen ipuin hori bera Interneteko gure leihoa lehenengo aldiz zabaldu orduko. Haren testu harrigarriak irakurriz, aurrerantzean ere gugan biziko da Juan Karlos, irribarrerik zabalenarekin; hori bai, beste bizitza batean.