Azken urteetan egindako lanari balioa emanez eta datorren agintaldian "dena emateko prest" itxi du udal eta foru hauteskundeetako kanpaina politikoa Azkoitiko EAJk. Jeltzaleek atzo arratsaldean egin zuten kanpaina amaierako ekitaldia Elkargunean, eta bertan azaldu zituzten EAJren helburuak, erronkak eta nahiak. Hasiera batean ekitaldia Balda plazan egitekoak ziren arren, eguraldia tarteko, Elkargunean egin behar izan zuten agerraldia. Dozenaka herritar eta jeltzale izan ziren Elkargunean Azkoitiko talderari eta Ana Azkoitia alkategaiari babesa agertzen.
Asier Aranbarri izan zen hitza hartzen aurrena, eta hark eskerrak emanez hasi zuen hitzartzea. Eskerrak eman zizkion Ana Azkoitiari, gainerako taldekideei eta Elkargunera bertaratutako guztiei. Aranbarrik aipatu zuen "kanpaina borobila" egin duela EAJk, eta hori nabarmendu nahi izan zuen. "Aspaldi hasi ginen lanean. Oroitzen dut nola iazko irailean hasi ginen auzoz auzo bilerak egiten, eta nola ibili ginen kalerik kale. Horrek herritarrekin harreman zuzena izatea ahalbidetu du, eta jasotako ekarpenak kontuan hartuz osatu dugu programa", adierazi zuen Aranbarrik.
Zalantzan dauden horiei
Kanpaina ia amaituta, oraindik botoa erabakita ez duten herritarrei zuzendu nahi izan zuen Aranbarrik; izan ere, EAJko kidearen hitzetan, "bada oraindik botoa eman edo ez zalantzan dagoen jendea, baita nori botoa eman argi ez daukana ere". Horrenbestez, herritar horiei eman nahi izan zien mezua: "Hemen zaudetenok badakizue nori emango diozuen boza, baina zalantzan dauden horiengana iritsi nahiko nuke. Haiek ez daude hemen, baina datozen egunetan kalean ibiliko gara, eta zuotako bakoitzak mezua ere zabal dezazuen nahi dut, jendeak argi izan dezan zergatik eman behar zaion botoa EAJri". Horretarako ariketa bat proposatu zuen Aranbarrik: "Botoa ematerakoan zertan jarri behar da arreta? Zerri begiratu behar zaio? Begiratu behar zaio alderdiaren ibilbideari, programari eta hautagaitzari. Beraz, hori egitera animatu nahi ditut herritarrak". Horri lotuta, Azkoitiko EAJren hautagaien esperientzia eta jakintza goraipatu zituen.
EAJren ibilbidea izan zuen hizpide aurrena, eta aipatu zuen jeltzaleek "asmatu" dutela politika egiten. "Euzko Alderdi Jeltzaleak ibilbide ederra dauka Euskadin, Gipuzkoan eta Azkoitian. EAJk programa bat dauka, programa sendoa. Eta izan garenari eta egin dugunari begiratzea garrantzitsua da, izan garenak egiten bai gaitu gaur garena". Alderdi jeltzalearen "lanaren adierazle eta lorpen" diren zenbait datu ere eman zituen Aranbarrik, eta hizketagai izan zituen Osakidetza, zaintza sistema nahiz pobrezia eta langabezia tasak.
Gainerako alderdiei begira ere jarri zen Aranbarri, eta kritiko agertu zen EH Bildurekin nahiz Azkoitia Bai Elkarrekin taldearekin. "Azkoitia Bai taldeak beti esaten du gainerako alderdiok ez ditugula erabakiak herrian hartzen, eta haiek direla Azkoititik Azkoitirako lana egiten duten bakarrak. Hori ez da horrela. Gainera, ezin dugu ahaztu Podemosen ateak jo behar izan dituztela zerrenda osatzeko; beraz, Azkoitia Bairi boza ematea Podemosi botoa ematea ere bada".
"Mimo handiz" egindako programa
Boza emateko deia
Ana Azkoitiak botoa ematearen garrantzia nabarmendu zuen, eta maiatzaren 28an boza ematera joateko deia egin zien herritarrei: "Hiru egun barru jakingo dugu zein izan den herriaren borondatea eta erabakia. Herritarren borondatea herritarren erabakia izateko, guztion botoa behar da. Zenbat eta herritar gehiagok eman botoa, orduan eta demokratikoagoa izango da emaitza. Ez gelditu etxean. Gure etsai nagusia abstentzioa da. Boza emateak legitimatu egiten du kritika, eta botoa ematen ez duenak norabidea hautatzeko duen eskubideari uko egiten dio".
Era berean, gogoratu zuen zein diren "bi aukera nagusiak" Azkoitian nahiz Gipuzkoan. "Lehia nagusia, Gipuzkoan nahiz Azkoitian, EAJren eta EH Bilduren artean egongo da. Beraz, garrantzitsua da lerratzea".
"Herri modernoa, aurrerakoia, justua eta berdinzalea" eraikitzen jarraitzeko prest agertu zen Azkoitiko EAJ atzokoan, eta bide horretan ekarpena egitearen garrantzia azpimarratu zuen Azkoitiak. Hain zuzen, aitortu zuen datorren agintaldian "burua eta bihotza" jartzeko prest dagoela. "Gutako bakoitzak asko dugu eskaintzeko. Lanari muzinik ez diogulako egiten. Betiko balioei eusten diogulako. Burua eta bihotza jarriko diogu agintaldi berriko erromla guztiei. Burua, erabaki zuzenak hartzeko, kudeaketa zintzoa eta eraginkorra egiteko. Bihotza, herrigintza sentitzen dugulako eta herri hau maite dugulako. Ezagutzen eta maitatzen den hori zaindu egin behar delako. Zaintzeko eta aurrera egiteko, herrigintza ezinbestekoa da. Politika egitera etorri gara; politika hitz handiz , herri hau hobetzen jarraitzeko prest gaudelako, eman boza EAJri". Mezu horrekin itxi zuen ekitaldia Ana Azkoitiak, bertaratutakoen txalo zaparrada artean.