Xabier Munibe Ikastolak hilaren 20ra atzeratu du hasiera batean zapatuan izatekoa zen 50. urteurreneko festa. Eguraldi iragarpena tarteko hartu du ikastolak jaia astebete atzeratzeko erabakia. "Eguraldi iragarpenaren bat bateko aldaketak eraginda hartu da erabaki hau", azaldu dute.
Dena den, ikastolak azaldu du XM50 festa egunerako lotutako egitaraua bere horretan mantenduko dela, nahiz eta "aldaketa txiki batzuk" jasan ditzaken. "Ez da erabaki erraza izan, eta jakitun gara horrek jendearengan eragozpenak sortu ditzakeela", adierazi dute. Horren aurrean, "barkamena" eskatu du antolatzaile taldeak.
Behin behinean, astebete atzeratuko dute festa, eta hilaren 20rako eguraldi iragarpena aldekoa ez bada, ekitaldia "beharrezko egokitzapenekin" ospatuko dutela nabarmendu dute antolatzaileek. Beharrezkoa balitz, egokitzapen horien gaineko xehetasunak aurrerago emango dituzte.
Sarrerak, bere horretan
Antolatzaile taldeak adierazi du herritarrek azken asteetan Xabier Munibe Ikastolaren historia txikia hara! ikuskizunerako hartu dituzten gonbidapen sarrerak "mantendu" egingo dituztela hurrengo astebururako. Halere, norbaitek hilaren 20ko ikuskizuna ezingo balu bertatik bertara ikusi, "ingurukoei ematen saiatzea" eskatu dute.
Hurrengo asteburuan ere 21:45ean itxiko dituzte herriko plazan egokituko duten gunea. Une horretatik aurrera, esleitu gabe gelditu diren sarrerak ilaran zain jartzen diren herritarrei emango dizkiete.
Bestalde, ikastolako komunitateko kideek egindako opariekin osatutako bost sarien zozketa ere hilaren 20an egingo dutela jakinarazi dute antolatzaileek. Ordura arte txartelak saltzen jarraituko dute. Sariak Rural Kutxaren erakusleihoan ikus daitezke.