Azkoitiko Musika Bandak kontzertua eskainiko du etzi, igandea, Baztartxo antzokian. 12:30ean hasiko da musikarien emanaldia han, eta guztira, zortzi abesti joko dituzte herritarren aurrean. Gainera, abesti horietan protagonismo berezia izango dute musika bandako kide gazteenek; izan ere, 16 eta 19 urte bitarteko musikariek bakarlari moduan parte hartuko dute zenbait kantetan.
Honako zortzi abesti hauek joko ditu musika bandak igandeko kontzertuan: Ralph Ford musikariaren Dillon’s Flight; Rob Aresen Memory –Danel Korta izango da bakarlaria– eta Springtime –Ane Epelde eta Eider Azpiazu izango dira bakarlariak–; Jaime Texidorren Crisócola –Nikole Aranbarri izango da bakarlaria–; Ronald Binguek konposatutako Romanza II.aren Concerto –Jon Agirrezabal izango da bakarlaria–; Smetanaren Moladau; Leroy Andersonen Sandpaper Ballet –Manex Senperena eta Oier Aldazabal izango dira bakarlariak–, eta Miklos Theodorakisen Zorba the Greek.